有人叫你『徐祐昌』，有人叫你『Sunny』，有人叫你『小鸚鵡』！但係我從來都淨係叫你做『徐友』，呢一個我叫咗成50年的名字！
我真係估唔到5月19日夜晚同你講電話，呢個竟然係你我之間最後的對話。雖然你的離開係對你病患最好的解脫，但來得實在係太突然！到而家，我都仲未能接受到你的離開！我真係好唔捨得你！
雖然和你從來沒有做過同班同學，但是由1976年高記中一開始認識，大家一齊參加紅十字會，經常一齊食飯、一齊去露營、一齊坐23B、一齊去睇戲、一齊去整蠱其他同學……你永遠都會帶畀大家歡樂和難忘的回憶！
到了大家離開高記，雖然大家各自有各自的家庭和工作，不再可能每天都好似中學咁經常見面，但無論是過年、過節、過生日、去BBQ、去行山旅行…大家往往會自然而然地搵到藉口聚在一起，又不斷重溫返我哋中學的趣事。而我哋身邊的另一半往往都好唔明白，點解我哋講嚟講去都係嗰啲嘢？！因為佢哋冇同我哋一齊經歷過我哋人生中最純真和開心的日子！！呢啲日子真係無你唔成事！
雖然你呢兩、三年患病期間過得比較辛苦，但是你真係可以開開心心過了你的一生！
徐友，你永遠都係我老友、永遠都會活在我和大家的回憶之中！
Kenny Lin (中學同學) & 太太Bonnie
