2022年，當我仲係澳洲讀緊書，有一日收到媽咪電話打嚟話爸爸腰痛，記得爸爸講咗句「最壞情況就係cancer嗰啲野，希望唔係」，我個陣答佢「腰痛啫，未至於cancer咁嚴重嘅，唔好自己嚇自己！」雖然我口係咁講，但收線之後難免都會有啲忐忑不安，結果一兩個星期後，就收到屋企電話，話爸爸確診胰臟癌第三期。當時嘅我同爸爸媽媽分隔兩地，自己一個係澳洲，加上本身面臨着大學final year實習嘅壓力，得知後心情好複雜好沉重，好想即刻飛返香港，但同時我知道，我要留係澳洲完成埋最後一個月嘅實習，及格並順利畢業，先唔會令爸爸媽媽操心，所以當時嘅我，只可以透過電話同爸爸facetime講下電話，更新佢嘅情況。直到我完成哂我嘅實習，我就即刻買機票，好匆忙咁返咗香港。
返到香港後，爸爸雖然已經做完手術，但仍然要不停做化療電療，慶幸醫生批准爸爸出國一星期去悉尼，出席我嘅大學畢業禮，順便一家人去旅行放鬆一下，帶爸爸媽媽體驗我係澳洲五年嘅生活，食唔同餐廳，雖然返到香港，先發現無帶爸爸去試我覺得好食過香港嘅肥叉燒鵝脾飯，但我諗佢個次澳洲旅行都係開心嘅。
諗返起由細到大，我同爸爸好少傾偈，最有印象就係，初中每次考試前爸爸都會同我温習理科，佢比我嘅印象就係，好玩得，但惡起上嚟，都可以好惡。好多人都話我同爸爸似樣，但我覺得相比起個樣，我同爸爸係性格上更似，大家嘅mbti都係F型人格（情感型），諗野都比較相近，相反媽咪係思考型人格，爸爸成日都講笑話，媽咪唔明我地諗咩，哈哈！
正正因為爸爸病咗之後無返工，留係屋企，而我係澳洲返嚟之後，都長時間係屋企，我地兩個多咗好多相處嘅時間，會傾偈講吓自己嘅嘢，一齊落街食早餐，陪爸爸覆完診之後，又會去附近食好西，個陣每次去覆診前，爸爸都會叫我揾定啲餐廳，等睇完醫生就帶佢食佢鍾意食嘅清湯腩、豬手撈粗、豬膶麵、生牛肉河、壽司、拉麵、日式燒肉… 後期爸爸身體慢慢變差，行路腳軟需要人扶，個陣時，係我大個女後，第一次拖爸爸隻手，一開始係好唔慣，去到後期，每次出街都會主動拖住爸爸，珍惜仲有得拖嘅日子。
5月17爸爸身體突然轉差，雙腳無力，連企起身都有困難，需要坐輪椅，本身樂觀地以為只係短暫，結果兩日後5月19日好突然係屋企由我call白車，捱到去醫院，我最後一次拖住爸爸隻手，過多一兩個鐘，佢就離開咗。雖然我好想可以同爸爸一齊慶祝埋父親節，但我相信呢三年抗癌嘅路，爸爸都承受咗好多痛楚，突然嘅離開，對佢嚟講可能係一種解脫，唔使再辛苦了。
放心，我會做一個令您自豪嘅職業治療師，好好工作，照顧媽咪，唔使擔心我地！父親節快樂，我愛您！
